ක්‍රිස්ටෝපර් කොලොම්බස් ට පෙර ඇමරිකාව තරණය කළ බෞද්ධ භික්ෂූහු

ක්‍රිස්ටෝපර් කොලොම්බස් ට පෙර ඇමරිකාව තරණය කළ බෞද්ධ භික්ෂූහු

(‘සිංහලේ නව නිදහස් සටන‘  විසිනි )

              ස්පාඤ්ඤයේ ෆර්ඩිනන්ඩ්ස් රජුගේ සහ ඉසබෙලා බිසවගේ අනුග්‍රහය ලැබ නැව් තුනක් සමගින් බටහිර බලා යාත්‍රා කළ ක්‍රිස්ටොපර් කොලොම්බස් විසින් 1492 දී ප්‍රථම වරට ඇමරිකාව (America) සොයාගන්නා ලදැයි යන මතය බිඳහෙලනු ලබන පුවතක් කලකට පෙර පුවත්පත් වල පළවිය. කොලොම්බස් ඇමරිකාව සොයාගැනීමට අවුරුදු දහස් ගණනකට පෙර මෙම මහද්වීපය චීන බෞද්ධයන් විසින් සොයාගන්නා ලදැයි ඒ ප්‍රවෘත්තියේ සඳහන් විය.

           බෞද්ධ ධර්ම ප්‍රචාරයෙහි යෙදුනු චීන භික්ෂූන්වහන්සේලා ඇමරිකාවට ගොස් ඇතැයි යන්න චීන ජාතිකයන් විසින් පිළිගනු ලබන කාරණයකි. ඔවුන් එසේ පවසන්නේ හුදු ප්‍රචාරය පිණිස නොව කිසියම් සැලකිය යුතු පදනමක් මත බව කරුණු පරීක්ෂා කර බැලීමේදී පෙනී යන්නකි. ‘උතුරු ශාන්තිකර සාගරය‘ (Nothern Pacific Ocean) ඔස්සේ යාත්‍රා කර පස්වෙනි සියවසේ අගභාගයේදී (ක්‍රි.ව. හාරසිය ගණන් වල) පමණ චීන ජාතිකයින් ඇමරිකාවට ගොස් ඇතැයි පිළිගනු ලැබෙයි. මෙය කොලොම්බස් ඇමරිකාව සොයා ගමන් ඇරඹීමට අවුරුදු 1000 කටත් ඉහත දී සිදුවූවකි. ‘චීන ගමන‘ පිළිබඳ විස්තර දැනට චීන කෞතුකාගාරයේ ඇති මුද්‍රණද්වාරයෙන් මේ වනතුරු ප්‍රසිද්ධ වී නැති ඉතිහාස ග්‍රන්ථයක සඳහන් වී තිබෙයි.

  අවුරුදු හාරදහසකට පමණ අධික කාලයක සිට ලියැවී ඇති චීන ඉතිහාසය බොහෝ දුරට නිවැරදි බව ඒ පිළිබඳව පරීක්ෂණ පැවැත්වූ ඉතිහාසඥයින් පවසන කාරණයකි. ක්‍රිස්තු වර්ෂයට අවුරුදු දෙදහසකට පමණ පෙර පවා චීන ජාතිකයන් ඉතා දුරින් පිහිටි රටවල් සම්බන්ධව දැන සිටියහ. එම රටවල් අතර යාම් ඊම් ද කළහ. ඇසිරියානු හෝ බැබිලෝනියානු බසින් ලිවීමේ හැකියාවක් ඇතිව සිටි තානාපතිවරයෙක් චීන රජුට අක්තපත්‍ර පිළිගන්වා තිබෙයි. ‘යුප්‍රටීස්‘ ගංගාධාරයේ තිබී පුරාවිද්‍යාඥයන් විසින් සොයාගන්නා ලද ලියවිලි අතර චීනය පිළිබඳ තොරතුරු ද දක්නට ලැබෙයි. මෙම පුරාවිද්‍යාත්මක සාක්ෂි චීනයේ ඉතිහාසය සමග සැසඳූ විට ‘චීන ඉතිහාසය‘ නිවැරදි බව තහවුරු වෙයි.

දූත ගමන්

       රෝමයේ සිට චීනයට ගිය දූත ගමන් කිහිපයක් පිළිබඳව ද චීන ඉතිහාසයේ දැක්වෙයි. එවක රෝමයේ සිටි එම්ප්‍රදෝරු රජුන්ගේ නම් නිවැරදිව චීන ඉතිහාසයේ සඳහන් වෙයි.

              ඉතිහාසයේ පැරණි යුගයේ සිටි චීන ජාතිකයන් මුහුදු යාත්‍රා කිරීමේ යෙදී සිටියහ. ක්‍රිස්තු වර්ෂයට පෙර චීන ජාතිකයින් මාලිමා යන්ත්‍රය හෝ එවැනි උපකරණයක් ආධාරයෙන් සමුද්‍ර යාත්‍රාවේ නොයෙදීණැයි කීමට ද හේතුවක් නැත. හයවෙනි සහ හත්වෙනි ශතවර්ෂ වලදී චීන ජාතිකයින් විසින් ලියන ලද සමහර පොත්වල ‘උතුරු ශාන්තිකර සාගරයේ‘ (Nothern Pacific Ocean) වෙරළාසන්න පෙදෙස් පිළිබඳව නිවැරදි විස්තර දක්නට ලැබෙයි. ‘ඇලූෂියන්‘ දිවයිනේ හා ඒවායේ මිනිසුන් ඔවුන්ගේ ඇඟහි සායම් තවරාගැනීමේ සිරිත ද එක් විස්තරයක සඳහන් වෙයි. ‘ඇලස්කා‘ ප්‍රදේශය පිළිබඳ සම්පූර්ණ විස්තරයක් තවත් ග්‍රන්ථයක එයි.

 

 (අලුශියන් ගෝත්‍රිකයෙක් )

       ඇලස්කාවේ සිට ගිනිකොනින් පිහිටි ගොඩබිමක් පස්වෙනි ශතවර්ෂයේ අවසාන භාගයේ දී චීන ජාතිකයන් විසින් සොයාගන්නා ලදි. ඔවුන් සොයාගන්නට ඇත්තේ වර්තමාන ‘මෙක්සිකෝව‘ (Mexico) හෝ මධ්‍යම ඇමරිකාව වියයුතු යැයි විශ්වාස කරනු ලැබේ. මේ සොයාගැනීම සම්බන්ධයෙන් දැනට චීනයේ පාසැල් ශිෂ්‍යයන්ට ද උගන්වන බව සඳහන් වෙයි.

        මේ සොයාගැනීම පිළිබඳ තොරතුරු ‘හෝයි ෂිං‘ නැමැති බෞද්ධ භික්ෂුවක විසින් අනාවරණය කරනු ලැබ ඉතිහාස පොතට ඇතුලත් කොට තිබෙයි. නැගෙනහිර දිග රටවල දීර්ඝ කාලයක් තිස්සේ සංචාරයෙහි යෙදී සිටි මෙම හෝයි ෂිං භික්ෂුව ක්‍රි.ව. 490 දී නැවත චීනය ට පැමිණියේ ය. ‘පූසාන්‘ නමින් හැඳින්වෙන රටකට තමා ගිය බව හෝයි ෂිං භික්ෂූන්වහන්සේ ගේ විස්තරයේ සඳහන් වෙයි. එරට ස්වදේශිකයන් ගැන ද විස්තරයක් කරන හෝයි ෂිං භික්ෂූන්වහන්සේ තමන් ට කලින් ක්‍රි.ව. 458 දී මේ රටට පිණ්ඩපාතික බෞද්ධ භික්ෂූන්වහන්සේලා පස් නමක් වැඩම කළ බව ද සඳහන් කර තිබෙයි.

          පූසාන් රට ගැන මින් පසු කිහිප තැනකම සඳහන් වෙතත් ඉන්පසු එහි ගිය කෙනෙකු සම්බන්ධයෙන් සටහනක් නැත. එහෙයින් ඒ රට පිළිබඳව චීන ඉතිහාසයෙහි සඳහන් වන්නේ හෝයි ෂිං භික්ෂුව කළ විස්තරය පමණකි.

ධර්ම ප්‍රචාරය

     බුද්ධ ධර්මය පතුරුවාලීම පිණිස බෞද්ධ භික්ෂූන්වහන්සේලා දුරු කතර ගෙවා යාම සිරිතක් ව පැවති බවට ඉතිහාසය සාක්කි දෙයි. එහෙයින් චීන භික්ෂූන්වහන්සේලා ධර්ම ප්‍රචාරය පිණිස පූසාන් රට බලා ගියහයි කීම අසත්‍යය කැයි සිතිය නොහැක. පූසාන් නමින් හැඳින්වෙන මේ රට ඇමරිකාව නොව ජපානය වියයුතු යැයි සමහරු කියති. එහෙත් කරුණු කිහිපයක් නිසා ඒ තර්කය බිඳවැටේ. ජපානයේ ඉතිහාසය අනුව ඒ රටට බුදුදහම ගෙන යන ලද්දේ ක්‍රි.ව. 458 දී නොව 522 දී ය.

   පූසාන් රට ජපානයේ ඇතැම් ඉතිහාසඥයන් විසින් පූසෝ නමින් හැඳින්වීම තවත් කරුණකි. ජපන් ඉතිහාසඥයන් සඳහන් කරඇති අන්දමට පූ‍සෝ රට පිහිටා ඇත්තේ මධ්‍යම ඇමරිකාවේ හෝ මෙක්සිකෝවේ විය යුතු ය.

       චීන ඉතිහාසයේ සඳහන් වන කාල වකවානුව මෙක්සිකෝව ස්පාඤ්ඤ ජාතිකයන් ගේ ආධිපත්‍යය ට නතුවීමට ශතවර්ෂ දහයක ට පමණ පෙර යුගයක් විය හැකි ය. එහෙයින් හෝයි ෂිං භික්ෂුවක එහි යනවිට තිබෙන්නට ඇත්තේ ඇස්බක් පරපුර හෝ ඊටත් පෙර වූ බැල්ටික් රජ පරපුර ද විය නොහැක. මෙය ඊටත් පෙරාතුව තිබී විනාශව ගිය ශිෂ්ටාචාරයක් විය යුතු ය. මෙක්සිකෝවේ තවමත් දක්නට ලැබෙන නටබුන් නගර මේ යුගයේ ඒවා වියහැකි බව ඇතැම් පුරාවිද්‍යාඥයන්ගේ මතයයි.

තවත් සාධක

එවැනි දුරාතීතයේ යුගයක මිනිසුන් තුල පැවති සිරිත් විරිත් කලින් කල වෙනස්වීම නියතයෙන් ම සිදුවන්නකි. ස්පාඤ්ඤ ජාතිකයන් මෙක්සිකෝව ආක්‍රමණය කරන අවධියෙහි ඒ සිරිත් විරිත් ස්වදේශිකයන් තුලින් ඉවත් වී ගොස් තිබුණි නම් එය පුදුමයට කරුණක් නොවේ. එහෙත් පුදුමයට කරුණ වන්නේ හෝයි ෂිං භික්ෂුන්වහන්සේ විසින් විස්තර කරන සිරිත් - විරිත් සහ ගති  - පැවතුම් ද වැඩිකොටසක් එවක ඇමරිකානු ස්වදේශිකයන් අතර නොවෙනස් ව තිබීමයි.

හෝයි ෂිං භික්ෂුව විසින්, පූසාන් රාජ්‍යය පාලන ක්‍රමය, පන්ති භේදය, කාලය මැනීම, පෙරහැරවල් පැවැත්වීම සහ අනෙකුත් සමාජ සිරිත් ආදිය විග්‍රහ කොට තිබෙයි. ස්පාඤ්ඤ ජාතිකයන් මෙක්සිකෝව ආක්‍රමණය කළ අවස්ථාවේ එහි සිටි ස්වදේශිකයන් අතර පැවති සිරිත් විරිත් සියල්ල  හෝයි ෂිං භික්ෂුව විසින් කරනු ලැබූ විස්තර වලට සමාන ය.

පූසාන් රටේ යකඩ පරිහරණයක් නොවී යැයි හෝයි ෂිං භික්ෂුව පවසන අතර යුරෝපීය යන් යනතුරු ම ඇමරිකාවේ ස්වදේශිකයන් යකඩ පරිහරණය පිළිබඳව දැන නොසිටි බව ඉතිහාස වාර්තා සඳහන් කරයි. තඹ, රිදී හෝ රත්‍රන්වල ද අගයක් පූසාන් වැසියන් ට නොවී යැයි සඳහන් කරන හෝයි ෂිං භික්ෂුවගේ ප්‍රකාශය ද සත්‍යය කි.

       මේ රට හෝයි ෂිං භික්ෂුව විසින් පූසාන් යැයි නම්කර ඇත්තේ එහිදී හමුවුණු එක්තරා බෙහෙත් පැළෑටියක් අනුව ය. චීනයේ වැවෙන පූසාන් නමැති ඖෂධීය පැළෑටියකින් ගන්නා ප්‍රයෝජන එරට ස්වදේශිකයෝ මේ ගසින් ද ලබාගන්නා හෙයින් හෝයි ෂිං භික්ෂුව ඒ රට පූසාන් නමින් හැඳින්වී ය. මේ ගස අගිල් ගස යැයි උපකල්පනය කළ හැකි ය. පූසාන් ගසින් ඇමරිකානුවෝ ලබාගන්නා ප්‍රයෝජන හෝයි ෂිං භික්ෂුව විසින් සවිස්තර ලෙස සඳහන් කර තිබේ. අදත් මෙක්සිකානුවෝ ඒ ගසින් හෝයි ෂිං භික්ෂුව විස්තර කළ ප්‍රයෝජන ලබති.

හෝයි ෂිං භික්ෂුව කරන විස්තර අනුව සලකා බලන විට ඇමරිකාව සොයාගැනීමේ ගෞරවය ක්‍රිස්ටෝපර් කොලොම්බස් ට නොව චීන ජාතිකයන් ට හිමිවිය යුතුබව අවිවාදයෙන් ම පිළිගත හැකි ය.

(Paul  Brockවිසින් Pate සඟරාවට ලියූ ලිපියක් ඇසුරිනි.)

(විශේෂ ස්තුතිය කේ. චන්ද්‍ර ශ්‍රී කුලරත්න මහතා ට)

(කරුණාකර උපුටා ගැනීමේදී උපුටනය සදහන් කරන්න)