කුමන හෝ ආගමක්‌ මුල් කරගනිමින් තම අරමුණු ඉටුකර ගැනීම සඳහා ඇතැම් පුද්ගලයන් කටයුතු කිරීම මේ කාලයේ දක්නට ලැබෙන සුලබ කාරණයකි. සමාජයේ අසරණ මිනිසුන්ගේ මොළවලට කුමන හෝ ආගමක නාමයෙන් වැරදි ආකල්ප ඇති කරමින්, මෙකී පුද්ගලයන් කරන්නේ තමන්ගේ ආර්ථික උවමනාවන් ඉටු කර ගැනීම පමණි. විටෙක බෞද්ධ ආගමද විටෙක කතෝලික ආගමද උපයෝගි කරගන්නා සමාජයේ කුමන හෝ ස්‌ථානයකින් මතු වන මෙම පුද්ගලයන් සියලු ධර්මයන්ට පටහැනි දේ සිදුකරමින් අසරණ මිනිස්‌ ජීවිත සමග සෙල්ලම් කරයි. මෙකී තත්ත්වය නිසා අප සමාජයේ වැඩිහිටි මිනිසුන් පමණක් නොව හය හතර නොතේරෙන කුඩා දරුවන් ද තම ජීවිතයෙන් වන්දි ගෙවූ සිදුවීම් කිහිපයක්‌ පසුගිය කාලයේ අපට අසන්නට ලැබිණි.
වර්තමාන ලෝකයේ වෛද්‍ය විද්‍යාව කෙතෙක්‌ දියුණු තැනක පැවැතිය ද වෛද්‍ය විද්‍යාවට පිටින් විවිධ ක්රමයන් ඔස්සේ ඇතැම් මිනිසුන් ලෙඩ රෝග සුව කිරීමට ගොස් පෙර සඳහන් තත්ත්වයට මිනිසුන් පත්වේ. යාඥා කිරීම මගින් ලෙඩ රෝග සුව කිරීම මෙවැනි එක් ක්‍රමයකි. මෙම යාඥා කිරීම මගින් ලෙඩ රෝග සුව කරගන්නට ගොස් මරණය ළඟා කරගත් පුවත් ද අප කොතෙකුත් අසා ඇත්තෙමු. මෙහි අවාසනාවන්තම තත්ත්වය මෙවැනි සිදුවීමකින් පසුව කාලයාගේ ඇවෑමෙන් අපේ රටේ මිනිසුන්ට එය අමතක වී යැමය. වර්ෂ 2008 ජුනි මාසයේදී දේවගැතිවරයකු ලෙස පෙනී සිටි පුද්ගලයකු විසින් තැඹිලි ගෙඩි 13 ක් සමග අමු කිsරි බෝතලයක්‌ පොවා දියවැඩියා රෝගය වැළඳුණු තරුණයකු සුව කරන්නට ගොස් එම තරුණයාගේ ජීවිතය බිලිගත් කතාව එවකට අපේ රටේ මහත් ආන්දෝලනයකට ලක්‌ වූ සිදුවීමක්‌ විය. එය රටේ සෑම මාධ්‍යයක්‌ම වාර්තා කර තිබිණි. "දිවයින" එය වාර්තා කර තිබුණේ "දෙවියන් වහන්ස මේ මුග්ධයන්ට ප්‍රඥාව දෙනු මැනවි" සිරස්‌තලය යොදාගෙනය.
අප මෙම සිදුවීම මෙම සටහන සඳහා යොදාගත්තේ අන් කිසිවක්‌ නිසා නොව එදා සමීරගේ මරණයට වගකිව යුතු දේවගැතිවරයා යෑයි සඳහන් පුද්ගලයා විසින් දිවුලපිටිය ප්රාදේශීය වසමේ කොටදෙණියාව නගරය මුල් කරගනිමින් යාඥා මධ්යස්ථානයක් ආරම්භ කිරීමට යැමෙන් එම ප්රදේශයේ ජනතාවගෙන් එයට එල්ල වන දැඩි විරෝධය මුල් කොට ගෙනය. අපේ රටේ ඕනෑම පුද්ගලයකුට තමන් කැමති ප්රදේශයක ඉඩමක්‌ මිලදී ගන්න, ගොඩනැඟිල්ලක්‌ ඉදි කරන්න, පමණක් නොව තමන් කැමැති ආගමක්‌ ඇදහීමේ අයිතියටද අප ගරු කළ යුතුය. එසේ නොමැතිව ආගමක නාමයෙන් මිනිසුන්ට විකෘති අදහස් ඉදිරිපත් කොට මිනිසුන් මුළාවට ලක්‌ කොට තම ආර්ථික අභිලාශයන් ඉටු කර ගැනීමට ඉඩ ප්‍රස්‌ථාව සැලසිය යුතු නොවේ. එම අරමුණ පෙරදැරිව අප කොටදෙණියාව ප්රදේශයේ ඉදිකරන්නට සූදානම් වනවායි සඳහන් කරන යාඥා මධ්‍යස්‌ථානය පිළිබඳව තොරතුරු සොයා බලන්නට එම ප්‍රදේශයට ගියෙමු.
එහිදී අප පළමු කොටම කොටදෙණියාව අඹගහලන්ද විවේකාරාමයේ විහාරාධිපති බලගල්ල සරස්‌වතී මහා පිරිවෙනේ ආචාර්ය ශාස්‌ත්‍රපති පනාපිටියේ සුමනවංශ හිමියන්ගෙන් තොරතුරු විමසුවෙමු.
පළමු කොට කිව යුතුයි මෙම විරෝධය කිසිදු ආගමකට එරෙහිව සිදු කරනු ලබන විරෝධයක්‌ නොවන බව. මෙම යාඥා මධ්‍යස්‌ථානය ආරම්භ කරන්න හදන පුද්ගලයා කිසියම් ආගමක දේවගැතිවරයෙක්‌ හෝ පූජකවරයෙක්‌ නොවන බව මා තරයේ කියා සිටිනවා. හුදෙක්‌ මොහු සමාජයේ ජනයාගේ මනස විනාශ කරමින් යාඥා මගින් ලෙඩ රෝග සුවකරනවා කියලා මුදල් හම්බකරන කූට පුද්ගලයෙක්‌. අප මේ පුද්ගලයා ගැන දීර්ඝ ලෙස කරුණු සොයා බැලුවා. එහිදී දැනගන්නට ලැබුණු තොරතුරු අනුව මොහු චතුර කථිකත්වයක්‌ ඇති මිනිසුන් මුළාවේ දැමීමට උපන් හපන්කම් ඇති, පුද්ගලයෙක්‌. මොහුගේ චරිතයද ඉතා පිළිකුල් සහගත එකක්. මා මෙහිදී සඳහන් කළ යුතුයි කොටදෙණියාව ප්රදේශය කියන්නේ 99% බෞද්ධයන් ජීවත් වන ප්‍රදේශයක්‌. සියයට 1 ක් පමණ කතෝලික දහම අදහන පිsරිසක්‌ ජීවත් වන ප්‍රදේශයක්‌. බෞද්ධ අපත් සමග කතෝලික දහම අදහන සුළු පිරිසක් ඉතාම හොඳ සබැඳියාවකින් මේ වන විට ජීවත් වෙනවා. මේ පුද්ගලයා මේ කරන කටයුතුත් සමග ඉදිරියේදී ඒ සබැඳියාවට යම් හානියක් සිදුවේවිදෝ සැකය අප තුළ තියෙනවා. මොහු මෙම යාඥා මධ්‍යස්‌ථානය ආරම්භ කරන්න පළමු කොට ඉදි කරන්න සූදානම් වූ ගොඩනැඟිල්ල තාවකාලිකව නතර කිරීම සඳහා අවශ්‍ය කටයුතු අප කළා. නමුත් අපට මේ මොහොතේ නැවත ගැටලුවක් මතුවෙලා තියෙනවා. මොහු ඊට යාබදව නිවසක්‌ ආකාරයටම ඉදිකරන ගොඩනැඟිල්ල පිළිබඳව. මෙය එම යාඥා මධ්‍යස්‌ථානය සඳහා ඉදිරියෙදී යොදා ගනීවි යන සැකය අපේ ජනතාව තුළ තියෙනවා. එසේ ඔහු කටයුතු කළොත් ඉතා ප්‍රජාතන්ත්‍රවාදී විදියට මෙම ප්‍රදේශයෙන්ම මොහුව එළවා දැමීමට අප කටයුතු කරනවා. ඔහු එම ගොඩනැඟිල්ලේ ජීවත් වුණාට අපට ගැටලුවක් නැහැ. නමුත් යාඥා මධ්යස්ථානයක් ලෙස එය භාවිත කොට මේ අසරණ මිනිසුන්ගේ ජීවිත විනාශ කරන්න ඔහුට ඉඩදෙන්න අපට පුළුවන් කමක් නැහැ. මොහු පසුගිය දින කිහිපයේදී මේ ප්රදේශයේ බෞද්ධ නිවාස කිහිපයකට නිවාස ආරක්ෂා කරන්න කියලා ගිහිල්ලා තියෙනවා. එහිදී එම බෞද්ධ නිවාසවල මිනිසුන්ට කියලා තියෙන්නෙ "මේ ගෙදර යක්‌ෂයෙක්‌ ඉන්නවා වහා ඉවත්කළ යුතුයි කියලා." ඊට පසුව කවුද යක්‍ෂයා කියලා ඇහුවහම ඔහු පෙන්වලා තියෙන්නේ බුදුරජාණන් වහන්සේගේ පිළිම හා පිංතූර. මෙය බෞද්ධ අපට විශාල වේදනාවක්‌. මොහුට මෙවැනි පහත් ක්‍රියාවන්වල යෙදිලා ව්‍යාපාර කරන්න ඉඩ දිය යුතු නැහැ. අප මේ පිළිබඳව ජනාධිපති තුමන්, බැසිල් රාජපක්‍ෂ මැතිතුමා, දිවුලපිටිය ප්රාදේශීය ලේකම්තුමා ඇතුළු සියල්ල දැනුවත් කළා.
අප විහාරාධිපති හිමියන්ගෙන් සමුගෙන පන්සලට යාබද බඩල්ගම ශු. ජපමාලා දෙව්මැඳුරේ ප්රධාන පියතුමන් වන ඇන්ටන් රංජිත් පියතුමන්ගෙන් තොරතුරු විමසුවෙමු.
මේ කියන පුද්ගලයා ශුද්ධ වූ සෙබස්තියන් මුනිතුමාව යොදාගෙන මුදල් ඉපයීමේ ඉතා පහත් වැඩපිළිවෙළක්‌ තමයි මේ සිදු කරමින් ඉන්නේ. කතෝලික සභාව කරන්නෙ සෙබස්තියන් මුනිතුමාට ගෞරව කරන එක. මේ පුද්ගලයා තම ව්‍යාපාර කටයුතු සඳහා ඒ ශුද්ධ වූ මුනිතුමාව යොදා ගැනීම ඉතාම කනගාටුදායකයි. පළමු කොට කිව යුතුයි කතෝලික සභාව කිසි විටෙක බලෙන් කිසිවකු තම ආගමට හරවා ගන්නෙ නැහැ. එය ඉතා පැහැදිලිව කිව යුතුයි. මේ කියන පුද්ගලයාව මම දන්නේ රටේ මහත් ආන්දෝලනයක්‌ ඇති වූ තැඹිලි ගෙඩි 13 ක් පොවලා තරුණයකු මිය යැමේ සිද්ධියෙන් පසුව. බෞද්ධ අය පැන් පූජා කරනවා, පැන් බොනවා වගේ කතෝලික සභාවෙත් තියෙනවා පැන් ටිකකට ආශිර්වාද කරලා දෙන සිරිතක්‌. නමුත් මොහු මොනවද මේ කරන්නේ. කතෝලික දහමට පටහැනි ඉතා පහත් ක්‍රියාවන්. ඒ සඳහා අප ඉඩ දිය යුතු නැහැ. මේ පුද්ගලයා කතෝලික සභාවේ ලියාපදිංචි නැහැ. ඒ වගේම දේවගැතිවරයකු හෝ පූජකවරයකු නෙවෙයි. මම දන්නේ නැහැ මේ ඔබ පෙන්වන විස්තර අනුව මෙවැනි මස්‌ මාංශ උපයෝගි කරගෙන ලෙඩකුට කරන ආශිර්වාදය මොකක්‌ද කියලා. ඉතාම පිළිකුලෙන් යුතුව හෙළා දකිනවා මේ දේවල්. මොහු තෝප්පුව ප්‍රදේශයෙත් මෙවැනි මධ්යස්ථානයක් ආරම්භ කරන්න සූදානම් වුණා. එහිදී ඔහු අසාර්ථක වුණා. එය අධිකරණය දක්වා ගියා. අධිකරණය ඔහුට දැනුම් දුන්නා මෙවැනි කටයුතු සිදු නොකරන ලෙස. ලංකාවේ කිසිදු තැනක මිනිසුන් මුළා කරමින් සිදු කරන මෙවැනි කටයුතු සඳහා ඉඩ දිය යුතු නැහැ. දැනගන්නට ලැබෙන තොරතුරු අනුව මොහු තවත් ස්‌ථානයක මෙම කටයුතු දැනටමත් කරගෙන යනවා. මෙම පහත් ක්‍රියා නතර කිරීම සඳහා අපගේ සහයෝගය ලබා දෙන බවත් කිව යුතුයි.
පියතුමාට සමුදුන් අප අනතුරුව 2008 වර්ෂයේ කිඹුලාපිටිය ප්රදේශයේ තැඹිලි ගෙඩි 13 ක් අමු කිරි සමග පොවා යාඥා මධ්‍යස්‌ථානයේදී මියගිය සමීරගේ පියා මුණගැසිණි. කටියල පාර කිඹුලාපිටිය ප්රදේශයේ පදිංචි චාල්ස්‌ එරික්‌ ප්රනාන්දු (59) මහතා මෙසේ පැවසීය.
දේවගැතිවරයකු ලෙස පෙනී සිටි රංජන් පාලිත නමැත්තා අප ප්රදේශයේ යාඥා මධ්යස්ථානයක් පවත්වාගෙන ගියා. මගේ දරුවා මේ යාඥා මධ්‍යස්‌ථානයේදී 2008 වර්ෂයේ ජුනි මාසයේදී මිය ගියා. අපි එදා මොහුට රුවටිලා මගෙ අහිංසක දරුවව නැති කරගත්තා. මොහු මගේ දරුවට දස වධ දීලා, දරුවගෙ බෙල්ල කඩාගෙන එතනම වැටුනට පස්‌සෙ ඉක්‌මනටම රෝහලකට ගොස් වෛද්‍යවරයකුට පෙන්වන්න කියලා කිව්වා. අප දරුවව රජයේ රෝහලට රැගෙන ගියත් වෛද්‍යවරු එහිදී කිව්වා දරුවා මිය ගියාට පසුවයි ගෙනත් තියෙන්නෙ කියලා. ලෙඩුන් සුව කරනවා කියලා මොහු කරන්නෙ විශාල බොරුවක්. මොහු කාන්තාවන් විශාල ප්රමාණයක් ඇසුරු කරන ඉතා පහත් පුද්ගලයෙක්‌. එම කාන්තාවන්ට මොහුට දාව දරුවන් පවා ඉන්නවා. මම මේවා කියන්නෙ පුද්ගලයෙකුට මඩ ගහන්න නෙමෙයි. රටේ මිනිසුන්ට මොහු මොනවගේ පුද්ගලයක්‌ද කියලා තේරුම් ගන්න. මම ඉතා ඕනෑකමින් ඉල්ලා සිටිනවා අපේ රටේ ජනතාවගෙන් මේ පුද්ගලයන්ට රැවටෙන්න එපා කියලා. එසේ රැවටුනොත් තමන් හරි හම්බ කරගත් දේ පමණක් නෙමෙයි ජීවිතත් නැති වෙන්න පුළුවන්. අද මට මගෙ දරුවව නැතිවෙලා විඳින වේදනාව හෙට දවසේ තවත් කෙනෙකුට වෙන්න පුළුවන්. ඒ නිසා මේ බොරුකාර වංචාවලට රැවටෙන්න එපා කියලා මම සියලු දෙනාගෙන්ම ඉල්ලා සිටිනවා.
අදහස් දැක්‌වූ කොටදෙණියාව ප්රදේශයේ පදිංචි කරුණානායක පතිරණලාගේ සෝමසිsරි
මෙම යාඥා මධ්‍යස්‌ථානය ආරම්භ කරන්න සූදානම් වන පුද්ගලයාට කාන්තාවන් පමණක් 4 දෙනෙක් ඉන්නවා. ඇතැම් කාන්තාවන් සඳහා වන්දි ගෙවනවා. මේ පුද්ගලයා ඉතාම දූෂිත පුද්ගලයෙක්‌. ආගම් නාමයෙන් මොහු කරන මේ නින්දිත පහත් වැඩ නතර කර දැමීම සඳහා වගකිව යුතු අංශ වහා මැදිහත් විය යුතුයි. එසේ නොවුණහොත් ඉතාම සාමකාමීව ජීවත් වන මේ ප්රදේශයේ ජනතාව බේද භින්න වෙන්න පුළුවන්. රටේ විවිධ තැන්වලින් මෙවැනි බොරුකාරයන් මේ කාලයේ මතු වෙන්න පටන් අරන්. මේ දේවල් නිසා බෞද්ධ ආගම පමණක් නොවෙයි කතෝලික ආගමත් විනාශ වෙන්න පුළුවන්. ඒ නිසා සියලු ආගම් නාමයෙන් ගරු ආගමික නායකයන්ගෙන් මම ඉතා ගෞරවයෙන් ඉල්ලා සිටිනවා මේ පුද්ගලයා මේ සිදු කරනු ලබන වංචාවන් වහා නතර කිරීම සඳහා මැදිහත් වන්න කියලා.
තම අදහස් දැක් වූ ඡේ. පී. සුභසිංහ මහතා (34)
තරුණයෙක්‌ හැටියට මේ ප්රදේශයේ ජීවත් වෙද්දී සියලු ආගම් අදහන අන් සියලු දෙනා සමගම අපි ඉතා හොඳ සංහිඳියාවකින් ජීවත් වන පිරිසක්. මේ අපගේ විරෝධය කිසිදු ආගමකට නොවන බව කිව යුතුයි. මේ යාඥා මධ්‍යස්‌ථානය ආරම්භ කරන්න යන පුද්ගලයා බෞද්ධ විරෝධී වැඩ කරමින් බුදුන් වහන්සේට අපහාස වන අයුරින් කටයුතු කරන බව අපට දැන ගන්නට ලැබුණා. මෙය ඉතා නින්දිත පහත් ක්‍රියාවක්‌. තරුණයෙක්‌ හැටියට අප සියලු දෙනා මේ ක්‍රියාදාමය ඉතා පිළිකුලෙන් යුතුව හෙළා දකිනවා. මේ පුද්ගලයාට මේ ප්රදේශයේ නෙමෙයි ඕනෑම ප්රදේශයක පුරවැසියෙක්‌ හැටියට ජීවත් වෙන්න තියෙන අයිතිය අප පිළිගන්නවා. නිවසක්‌ ආකාරයෙන් මේ මොහොතේ ඉදිවෙමින් පවතින ගොඩනැඟිල්ල ඉදිරියේදී මොහුගේ මේ පහත් ක්‍රියාවන් සඳහා යොදා ගතහොත් ඉතාම ප්‍රජාතන්ත්‍රවාදී විදියට මොහුව මේ ප්‍රදේශයෙන් එළවා දැමීම සඳහා කටයුතු කරන බව ඉතා ඕනෑකමින් කියනවා. අප රටේ මුළු මහත් ජනතාවගෙන්ම ඉල්ලා සිටිනවා මොවුන් පිළිබඳව අවදියෙන් සිටින්න. මෙය කොටදෙණියාව ප්‍රදේශයට විතරක්‌ ලඝූ ප්රශ්නයක් නොවෙයි. හෙට දවසේ මොහු හෝ මෙවැනිම පුද්ගලයන් ඔබ ජීවත් වන ප්‍රදේශයෙන්ද මතු වන්න පුළුවන්. ජනතාව අවදියෙන් සිටින්න.
සැබවින්ම ලෙඩ සුවකරන මුවාවෙන් තම අරමුණු ඉටු කරගැනීමට උත්සාහ ගන්නා මෙවැනි පුද්ගලයන් ගැන රටේ සමස්ත පුරවැසියාම අවදියෙන් සිටිය යුතු කාලයක් උදා වී ඇති බව ඉතා පැහැදිලිය.
මොවුන්ට මෙම කටයුතු කරගෙන යැම සඳහා ආගම් විරෝධී කිසියම් සංවිධානයක්‌ මගින් අවශ්‍ය කරන මුදල් පොම්ප කරනවාද විය හැකියි. එබැවින් සමස්ත පුරවැසියාගෙන් අපද ඉල්ලා සිටින්නේ මෙවැනි වංචාකාරයන්ගෙන් තම දරුවා පමණක් නොව සියලු ජනී ජනයාගේ ජීවිත රැක ගැනීම උදෙසා මොවුන්ට නොරැවටෙන ලෙසය. අපද මෙවැනි පුද්ගලයන්ගෙන් දෙවියන්ගේ නාමයෙන් ඉල්ලා සිටින්නේ අසරණ මිනිස්‌ ජීවිත සනසනවා වෙනුවට ඔවුන්ගේ අසරණකමින් ප්‍රයෝජන ගෙන තම ආර්ථික උවමනා සහ ලෞකික අවශ්‍යතා ඉටු කර ගෙන අසරණ මිනිසුන්ගේ ජීවිත සමග කරන සෙල්ලම වහා නවතා ඔවුන්ට සරණක්‌ වන ලෙසය. මෙම බොරුවද නවත්වන්නේ නම් එයද එම ජනයාට සරණක්‌ බව අවසාන වශයෙන් අප සටහන් කරන්නෙමු.
නිශ්ශංක සංජීව
