ඉඳිකටු සිදුරෙන් රිංගන ඔටුවෝ

ඉදිබුවෙකුගෙන් පිහාටු ගන්නවාක් මෙන්ම ඉඳිකටු සිදුරෙන් ඔටුවෙකු රිංගා යෑම වැනිදෑ අප ව්‍යවහාරයට එක්වී ඇත්තේ කිරීමට කිසිසේත් නොහැකි සේ ඉතාමත් දුෂ්කර වූ කර්තව්‍යයක් උපමා කිරීම සඳහායි. ඔබ කිතුනුවෙක් නම් බයිබලයේ ශූභාරංචි ග්‍රන්ථයක හමුවන ධනවතකුට ස්වර්ග රාජ්‍යයට ඇතුළුවීමට වඩා ඔටුවකුට ඉඳිකටුවලින් රිංගායාම පහසු යැයි “ක්‍රිස්තුන් වහන්සේ වදාළ උපමා වැකිය අසා ඇතුවාට සැක නැත. එකී ප්‍රකාශය අභියෝගයට ලක්කිරීමට සිතූ රුසියානු ජාතික කලාකරුවකු ඉදිකටු සිදුරක් තුළ අන්වීක්ෂීය ප්‍රමාණයේ ඔටුවන් සත් දෙනෙකුගෙන් යුතු තවලමක් පමණක් නොව ඉඳිගස් තුනක්ද නිර්මාණය කිරීමට සමත්විය. සිඅට වසරක් පැරණිඅන්වීක්ෂයක්ද, මැලියම්, සිරින්ජර හා කුඩා ඉරටු කැබලි ආධාරයෙන් මෙබඳු අන්වීක්ෂීය ප්‍රමාණයේ නිර්මාණ සිදුකරනුයේ “නිකොලායි ඇල්ඩුනින්ය.” මොස්කව් නුවර සිය නිවසේ සිට නිර්මාණකරණයේ යෙදෙන ඇල්ඩුනින්ගේ කලාකෘති කෙතරම් සියුම් එමෙන්ම සංකීර්ණදැයි කිවහොත් පියවි ඇසට පැහැදිලිව දැකගත නොහැකි. එකී නිර්මාණ සතු සූක්ෂම විස්තරාත්මක ස්වභාවය තාත්වික අයුරින් නිර්මාණය කිරීම සඳහා සිය හදවත ගැහෙන රාවයට නොදවෛනි සංයමයකින් යුතුව ඔහු නිර්මාණකරණයේ යෙදෙන්නේය. ඒ සඳහා ඔහුට පෙළඹවීමක් ලැබි ඇත්තේ “ලෙවිෂා නමැති වමත හුරු කලාශිල්පියා පිළිබඳ රුසියාවෙන් වාර්තාවන ඓතිහාසික කතාවක් ඇසුරිණි.

මෙතරම් කුඩා වූද සංකීර්ණ වූද නිර්මාණයේ යෙදෙන කළ අසීමිත ලෙස බලා‍පොරොත්තු කඩවීමේ අවස්ථාවලට ඔහු මුහුණ දුන් වාරද අනන්තය. වරෙක සති දෙකක කාලයක් මුළුල්‍ලේ තමා නිර්මාණය කරමින් සිටි අන්වීක්ෂීය ප්‍රමාණයේතුවක්කුවක කුඩා කොටසක් නැතිවීම නිසාවෙන් ඔහුට මුළු නිර්මාණයම ඉවතලා යළිත් මුල සිට සියල්ල නිර්මාණ කිරීමට සිදුව තිබිණ. අසීමිත ලෙස වෙහෙස වී වචනයට පෙරළිය නොහැකි කැපවීමකින් යුතුව සිදුකළ එවන් එක් නිර්මාණයකට එබඳු ශෝචනීය ඉරණමක් අත්වීම ඇල්ඩුනින් පමණක් නොව අන්කවර කලාකරුවකුට හෝ වුවද දරා ගැනීම ලෙහෙසි නොවේ. යළිත් සියල්ල මුල සිට අරඹමින් ඉච්ඡා භංගත්වයට පත්නොවී මීළඟ නිර්මාණයේ සාර්ථකත්වය කෙරෙහි පමණක් අවධානය යොමු කරමින් නිර්මාණකරණයේ නියැළීම වැදගත් බව ඇල්ඩුනින් තරයේ අදහන්නකි.
“ඔබගේ උත්සාහයන් අසාර්ථක වන්නා වූ කිසිම විටක ඔබ සිත් තැවුලට පත් නොවිය යුතුයි. මන්ද ඔබගේ ආත්මීය හා ෙචෙතසික සංවේදනාවන් එයාකාරයෙන්ම ඔබගේ දෑත් කරාත් එතැනින් ඔබගේ නිර්මාණය වෙතත් සම්ප්‍රේෂණය වන බැවිනි.

ප්‍රියන්ති රුද්‍රිගු