වසර පනස් දහසකට ආසන්න කාලයක් මිනිස් දෑසින් සඟවා තබන ලද පුරාණ යකැදුරන් විසින් භාවිතා කළ ඉපැරණි මන්ත්‍ර ගල් එකතුවක් පැනමාවේ සමුද්‍ර සන්ධිය අසළ පිහිටි ලෙනක් තුළින් පසුගියදා හමුවන ලද්දේ පුරාවිද්‍යා කැණීම්වල ප්‍රතිඵලයක් ලෙසයි.
“කැසිටා ඩී.පියෙඩ්‍රා” නමැති ලෙනකින් සොයාගත් පාෂාණ කැබලි දොළසකින් පමණ වූ මෙම මන්ත්‍රගල් එකතුව මධ්‍යම ඇමෙරිකාවේ පිහිටි එකී ප්‍රදේශයෙන් හමුවූ පුරාණ යකැදුරන්ගේ මන්ත්‍ර සම්ප්‍රදායන් හෙළිකරන ප්‍රථම භෞතික සාක්ෂිය ලෙස සැලකේ. පුරාවිද්‍යා ගවේෂණය සිදුකරන ලද පැනමාවේ නිවර්තන ගවේෂණ ආයතනය විසින් සිදුකළ ව්‍යාපෘතියක ප්‍රතිඵලයක් ලෙස මෙලෙස ලොව හමුවේ පෙනී සිටීමට වරම් ලද මෙම කෞතුක වස්තූන් සම්බන්ධයෙන් සිදුකරන ලද කාබන් දින නිර්ණය කිරීමේ පරීක්ෂණයන්ගෙන් පෙනී ගොස් ඇත්තේ මේවා වසර හාරදහස් අටසියයක් තරම් ඈත අතීතයකට හිමිකම් කියන්නක් බවයි.
1970 වකවානුවේ පටන් “පැනමා සමුද්‍ර සන්ධිය අසල පිහිටි “කැසිටා ඩී.පියෙට්‍රා” ලෙන හා ඒ ආශ්‍රිත ප්‍රදේශය පුරාවිද්‍යාත්මක කැණීම්වලට ලක්ව තිබුණද මෙම මන්ත්‍ර ගල් එකතුව සොයා ගැනීමට ලැබි ඇත්තේ “රූත් ඩිකවු” නමැති පුරාවිද්‍යාඥවරිය මෑත කාලීනව පළ කළ අදහසක් සැලකිල්ලට ගැනීමේ ප්‍රතිඵලයක් ලෙසය. ඇයගේ විශ්වාසය වී ඇත්තේ මෙම ලෙන් පුරාණ මුතුන් මිත්තන් විසින් වසර නවදහසකට ආසන්න කාලයක් භාවිතා කරන ලද්දේ ඉවුම් පිහුම් කටයුතු හා ආයුධ තැනීමේ කර්තව්‍යයන් සඳහා බවයි. ලෙන තුළ තිබි සොයා ගන්නා ලද මෙම ගල් කැබලි දොළසම එකට වෙළී තනි සංයුක්තයක් ලෙස පැවතී ඇත්තේ මීට සහස්‍ර කිහිපයකට පෙරදී යකැදුරකු හෝ වෙදෙකු විසින් මෙකී ගල් එකට අසුරා තිබූ බව කියා පාමිනි.
“රූත් ඩිකාවුගේ” මෙහෙයවීමෙන් සිදු කරන ලද කැණීමකදී අහඹු ලෙස මතුවූ මෙම පාෂාණ එකතුව අතර පාරදෘෂ්‍ය තිරිවානා (ක්වාට්ස්) යපස් පාෂාණ හා චුම්භක ලක්ෂණ පෙන්නුම් කරන ගල් කැබලිද හමු වී තිබේ. අදටද කොස්ටාරිකාවේ යකැදුරන් විසින් මළගියවුන් හා සන්නිවේදනය කිරීමට හා රෝග නිර්ණය කිරීම සඳහා භාවිතා කරන මෙම මන්ත්‍ර ගල්, පැනමාවේ රත්‍රං ඉල්ලම් බහුලව ඇති “මධ්‍යම කොර්ඩි‍ලේරා” ප්‍රදේශයෙන් මුල්වරට සම්භවය වන්නට ඇති බව සැලකේ.
0 comments:
Post a Comment